Róbert Geir Gíslason framkvæmdastjóri Handknattleikssambands Íslands staðfestir við Vísi í morgun að til skoðunar sé framkoma áhorfanda úr röðum Hauka á viðureign Aftureldingar og Hauka í Olísdeild karla sem fram fór á Varmá á síðasta fimmtudag. Áhorfandinn hrinti Ihor Kopyshynskyi leikmanni Aftureldingar.
Á sjónvarpsupptöku af atviki sem átti sér stað á milli Ihors og Ólafs Ægis Ólafssonar er að sjá að áhorfendandi kom aðvífandi og hrindi Ihor eftir að hann og Ólafur Ægir féllu á auglýsingaskilti. Upp úr sauð um stund og fleiri blönduðu sér í málið, þar á meðal Stefán Rafn Sigurmannsson leikmaður Hauka.
Íhuga næstu skref
Róbert Geir segir við Vísi að hann hafi rætt við forráðamenn Aftureldingar og Hauka vegna atviksins og verið sé að íhuga hvaða skref verði næst stigin.
Afturelding og Haukar mætast í fimmta og síðasta sinn í undanúrslitum Olísdeildar karla að Varmá klukkan 20.15 í kvöld. Uppselt er á leikinn.
