Soffía Steingrímsdóttir, markvörður, hefur samið við Gróttu til næstu þriggja ára. Soffíu þekkir Gróttufólk vel enda er hún uppalin í félaginu og hefur leikið með liði félagsins í nokkur ár. Seinasta sumar skipti Soffía yfir í Fram en kom til baka á láni í janúar og stóð sig með prýði.
Soffía er fædd árið 2000 og hefur leikið 123 leiki fyrir Gróttu.
„Það eru frábærar fréttir að Soffía verði hjá okkur næstu þrjú árin enda frábær markvörður með mikla reynslu. Soffía er auk þess mikill karakter sem við bindum miklar vonir við að verði í lykilhlutverki við atlöguna að Olísdeildarsæti á næsta tímabili,“ er haft eftir Sigurjóni Friðbirni Björnssyni þjálfara Gróttu í tilkynningu.
Grótta hafnaði í þriðja sæti Grill 66-deildar í vor og lék í undanúrslitum við ÍR í umspili Olísdeildarinnar en tapaði í oddaleik.
Grótta endurheimti á dögunum Tinnu Valgerði Gísladóttur eftir veru hjá Fram auk þess sem samið var við Daðeyju Ástu Hálfdánsdóttur sem einnig lék með Fram í vetur.
