Íslendingaliðið Volda féll úr norsku úrvalsdeildinni í handknattleik kvenna í dag eftir eins marks tap á heimavelli, 34:33. Framlengja varð leikinn til þess að knýja fram úrslit og tókst Oppsal að vinna í háspennu og tryggja sér sæti í efstu deild á næstu leiktíð á kostnað Volda sem kom upp í úrvalsdeildina í fyrsta sinn fyrir ári. Oppsal hafnaði í þriðja sæti næst efstudeildar í vor.
Birta Rún Grétarsdóttir er samningsbundin Oppsal en hefur ekkert leikið með liðinu í vetur eftir að hafa slitið krossband fyrir ári.
Dana Björg Guðmundsdóttir skoraði þrjú mörk fyrir Volda og Katrín Tinna Jensdóttir tvö. Rakel Sara Elvarsdóttir var ekki í leikmannahópi Volda.
Halldór Stefán Haraldsson er þjálfari Volda en að öllum líkindum var þetta hans síðasti leikur. Halldór Stefán flytur heim í sumar og tekur við þjálfun karlaliðs KA. Hilmar Guðlaugsson er aðstoðarþjálfari Volda. Hann er einnig á heimleið á næstu vikum.
Katrín Tinna er sömuleiðis að kveðja Volda. Hún samdi við sænska úrvalsdeildarliðið Skara HF fyrir nokkrum vikum.
