Handknattleikskonan Emilía Ósk Steinarsdóttir hefur ákveðið að ganga til liðs við FH á nýjan leik eftir að hafa verið í Danmörku á síðasta vetri. Emilía Ósk var ytra í herbúðum Ajax í Kaupmannahöfn og lék með U19 ára liði félagsins.
FH greinir frá komu Emilíu Óskar í dag og segir hana hafa skrifað undir samning við félagið. Hún stendur á tvítugu og er rétthent skytta. Emilía Ósk var á meðal markahæstu leikmanna FH í þrjú tímabil áður en hún fór til Danmerkur á síðasta sumri auk þess að eiga sæti í U19 ára landsliði Íslands á EM sumarið 2021.
FH leikur í Grill 66-deildinni á næstu leiktíð. Árni Stefán Guðjónsson tekur við þjálfun liðsins í upphafi næstu leiktíðar. Mikill hugur er í FH-ingum að halda áfram að byggja upp sitt unga og efnilega lið.
