Reykjavíkurúrval stúlkna í handknattleik, fæddar 2009, gerðu sér lítið fyrir og unnu gullverðlaun í borgarkeppni Norðurlandanna í morgun. Mótið fór fram í nágrenni Helsinki í Finnlandi.
Þetta er í fyrsta skiptið sem Reykjavíkurúrvalið kemur heim með gullverðlaun frá mótinu. Á síðasta ári hreppti úrvalslið Reykavíkur silfurverðlaun.
Reykvísku stúlkurnar unnu lið Óslóar, 22:15, Stokkhólms, 22:17, Helsinki, 32:4, en gerði jafntefli við Kaupmannahafnarliðið, 27:27. Úrslit mótsins réðust á markatölu þar sem Reykjavíkurúrvalið stóð betur að vígi en danska liðið svo munaði 20 mörkum.
Í fyrra tapaðist úrslitaleikurinn gegn Kaupmannahafnarliðinu. Sigurinn á mótinu er enn sætari í ljósi þess.
Í Reykjavíkurúrvalinu eru: Elín Klara Finnbogadóttir, Tinna Ómarsdóttir, Ína Daðey Eysteinsdóttir, Anna Margrét Alfreðsdóttir, Anita Rut Eggertsdóttir, Arna Sif Jónsdóttir, Margrét Magnúsdóttir, Lena Líf Orradóttir, Katla Kristín Hrafnkelsdóttir og Laufey Helga Óskarsdóttir. Þjálfari liðsins er Sigríður Unnur Jónsdóttir.
