Sunna Guðrún Pétursdóttir markvörður hefur rift samning sínum við svissneska A-deildarliðið GC Amicitia Zürich vegna þess að félagið stóð ekki við samninginn. Sunna Guðrún kom heim í gær og ætlar að velta málum fyrir sér áður en hún stígur næstu skref á handknattleiksvellinum.
„Ég var á tveggja ára samningi en ákvað að rifta honum þar sem það var ekki alveg staðið við hann,“ sagði Sunna Guðrún sem gekk til liðs við félagið á síðasta sumri eftir að hafa leikið með KA/Þór og m.a. orðið Íslands- og bikarmeistari með liðinu 2021.
Í góðri vinnu
„Ég lenti á Íslandi í gær og ætla mér að vera hér þar sem ég er með góða vinnu hjá Verkís og gott að vera hjá fjölskyldunni og vinum. Fókusinn núna hjá mér er bara aðeins að slaka á eftir þetta ævintýri. Ég mun klárlega sakna þess að spila með liðinu,“ sagði Sunna Guðrún Pétursdóttir markvörður við handbolta.is í morgun.
GC Amicitia Zürich gekk nokkuð vel á leiktíðinni og komst hjá því að sogast niður í fallbaráttuna.
