Stutt sumarfrí verður hjá leikmönnum Magdeburgar; Gísla Þorgeiri Kristjánssyni og Ómari Inga Magnússyni. Leikmenn liðsins hafa verið kallaðir heim til æfinga í júlí og leika þeir fyrsta leik sinn á undirbúningstímabilinu við Bergischer HC 1. ágúst. Arnór Þór Gunnarsson verður aðstoðarþjálfari Bergischer HC. Leikurinn fer fram Calbe (Saale) suður af Magdeburg.
Síðan koma Ólafur Stefánsson og Guðmundur Þórður Guðmundsson með lið sín til að glíma við Magdeburg í ágúst. Ólafur, fyrrverandi leikmaður Magdeburgar, er aðstoðarþjálfari HC Erlangen, sem leikur við Magdeburg í Halle 16. ágúst og fjórum dögum seinna mætir Guðmundur Þórður Guðmundsson og lærisveinar hans hjá danska liðinu Fredericia til Þýskalands og leika í Jessen.
Magdeburg leikur gegn Dessau-Rosslauer HV06 8. ágúst og 12. – 13. ágúst fer fram fjögurraliða mót í Westfalen-höllinni í Dortmund; Magdeburg, Aalborg (Danmörk), HBC Nantes (Frakkland) með Viktor Gísla Hallgrímsson markvörð innanborðs og þýska liðið TBV Lemgo Lippe.
Þá leika Gísli Þorgeir, Ómar Ingi og félagar heimaleik við Gorenje Velenje frá Slóveníu 18. ágúst.
Áður en að sumarfríinu kemur verður Gísli Þorgeir i eldlínunni með SC Magdeburg í úrslitum Meistaradeildar Evrópu í Köln um helgina. Á laugardaginn mætir Magdeburg Evrópumeisturum Barcelona í undanúrslitum. Sigurliðið leikur til úrslita á sunnudaginn við Kielce eða PSG og tapliðið leikur um bronsverðlaun sama dag.
