Furunes verður leikmaður Hauka

Haukar hafa samið við norsku handknattleikskonuna Ingeborg Furunes til næstu tveggja ára. Hún leikur stöðu hægri skyttu og er 24 ára gömul eftir því sem fram kemur í tilkynningu félagsins í kvöld.

Furunes er uppalin hjá Bodö en lék í tvö ár með Volda áður en hún gekk í raðir Fredrikstad hvar hún hefur verið undir stjórn Elíasar Más Halldórssonar síðustu tvö ár.

„Það er ánægjulegt að Ingeborg sem er 24 ára gömul skuli velja að koma til Hauka og takast á við nýjar áskoranir á sínum handboltaferli. Við bjóðum hana velkomna en það verður spennandi að fylgjast með henni í Haukabúningnum á næsta keppnistímabili,“ segir í tilkynningu Hauka.