Kvennalandsliðið í handknattleik, stelpurnar okkar, fengu úthlutað sæti á HM ásamt Austurríki samkvæmt tilkynningu Alþjóðahandknattleikssambandsins (IHF) í morgun þegar ákveðið var hvaða tvö lið fengju boðssæti á HM 2023.
Leikið verður í Skandinavíu, það er að segja í Noregi, Svíþjóð og Danmörku frá 30. nóvember til 17. desember. Kvennalandsliðið er því á leið á sitt fyrsta stórmót síðan 2012 og á HM í fyrsta sinn í 12 ár.
Íslenska liðið lék í umspili gegn Ungverjalandi um laust sæti á HM í vor en tapaði. HSÍ sótti fast að fá annað af tveimur sætum sem stjórn IHF úthlutaði enda tapaði íslenska landsliðið með næst minnstum mun í undankeppni á HM. Austurríki tapaði með minni mun, tveimur mörkum fyrir Spáni.
Ísland verður í fjórða og neðsta styrkleikaflokki þegar dregið verður í riðla 6. júlí nk.
Þetta eru frábær tíðindi fyrir íslenskan kvennahandbolta og ritstjórn handbolti.is óskar öllum sem í hlut eiga innilega til hamingju.
