Eftir tvo sigurleiki í gær á Opna Evrópumótinu í handknattleik karla, skipað leikmönnum 17 ára og yngri, hittu íslensku piltarnir fyrir ofjarla sína í morgun þegar þeir mættu sænska landsliðinu.
Svíarnir reyndust mikið sterkari í leiknum og unnu með átta marka mun, 28:20, eftir að hafa verið fimm mörkum yfir að loknum fyrri hálfleik, 13:8.
Síðar í dag, kl. 17.00, leikur íslenska liðið við pólska landsliðið. Leiktíminn er 2×20 mínútur.
Hægt verður að fylgjast með endurgjaldslausu streymi frá leiknum á EHFtv.com.
Mörk Íslands: Magnús Dagur Jónatansson, 4, Dagur Árni Heimisson 3, Harri Halldórsson 2, Stefán Magni Hjartarson 2, Jónas Karl Gunnlaugsson 2, Óskar Antoine Pantano 2, Ágúst Guðmundsson 2, Jens Bragi Bergþórsson 1, Nathan Doku Helgi Asare 1.
Óskar Þórarinsson og Sigurjón Bragi Atlason eru markverðir íslenska landsliðsins. Því miður eru engar upplýsingar um varin skot á upplýsingasíðu EHF.
