Hrafnhildur Anna Þorleifsdóttir markvörður sem varð Íslandsmeistari með Val í vor hefur skrifað undir eins árs lánssamning við uppeldisfélag sitt, FH. Hrafnhildur Anna er öllum FH-ingum að góðu kunn enda uppalin í Fimleikafélaginu en hún lék allan sinn feril hjá FH áður en hún gekk til liðs við Val fyrir síðasta tímabil.
Aukin samkeppni er um markvarðastöðuna hjá Val eftir að samið var við Hafdísi Renötudóttur í vor auk þess sem Sara Sif Helgadóttir heldur sínu striki á Hlíðarenda.
FH leikur í Grill 66-deild kvenna á næstu leiktíð. Liðið hefur styrkt raðirnar fyrir næstu leiktíð og er koma Hrafnhildar Önnu einn liðurinn í því auk þess sem nýr þjálfari tekur við liðinu, Árni Stefán Guðjónsson.
„Hrafnhildur Anna hefur sýnt það og sannað undanfarin ár að hún er gríðarlega öflugur markvörður og við fögnum því að fá hana aftur í FH-treyjuna á næsta tímabili,“ segir m.a. í tilkynningu FH í dag.
