Piltarnir í U17 ára landsliðinu töpuðu naumlega fyrir Sviss, 25:24, í síðari leik dagsins á Opna Evrópumótinu í handknattleik í Gautaborg síðdegis í dag. Svissneska liðið skoraði sigurmarkið rétt áður en leiktíminn var úti. Sviss var einnig marki yfir að loknum fyrri hálfleik, 11:10.
Íslensku strákarnir mættu vel stemmdir til leiks og náðu frumkvæðinu fljótlega í leiknum og komust meðal annars yfir, 7:4. Þá fór vörnin að slakna aðeins ásamt því að íslensku strákarnir klikkuðu á dauðafærum. Svissnesku strákarnir fóru þar með marki yfir inn í hálfleikshléið, 11:10.
Svissneska liði hélt frumkvæði sínu áfram í seinni hálfleik en íslensku strákarnir voru þó aldrei langt undan. Miklu munaði að erfiðlega gekk að koma vörninni í gang. Strákarnir gáfust þó aldrei upp og náðu að jafna metin, 24:24, þegar 15 sekúndur voru til leiksloka. Svisslendingar tóku þá leikhlé, lögðu á ráðin, og tókst að skora síðasta mark leiksins á lokasekúndunum.
Mörk Íslands: Dagur Árni Heimisson 9, Ágúst Guðmundsson 4, Jens Bragi Bergþórsson 4, Jónas Karl Gunnlaugsson 3, Magnús Dagur Jónatansson 1, Stefán Magni Hjartarson 1, Antonie Óskar Pantano 1, Harri Halldórsson 1.
Óskar Þórarinsson varði 5 skot og Sigurjón Bragi Atlason 1.
Síðasti leikur milliriðlakeppninnar verður í fyrramálið gegn Ísraelsmönnum. Flautað verður til leiks klukkan 10.
Á föstudaginn verður leikið um sæti. Ljóst er að íslenska liðið verður á meðal átta efstu.
