Samkomulag hefur náðst um að Sara Dögg Hjaltadóttir leikmaður Íslandsmeistara Vals leiki með nýliðum ÍR á næstu leiktíð. Þetta hefur handbolti.is samkvæmt heimildum. Mun samkomulag fyrir um lán á Söru Dögg liggja fyrir á milli Vals og ÍR og gildir samkomulagið út keppnistímabilið.
Sara Dögg gekk til liðs við Val fyrir ári eftir að hafa leikið um nokkurra ára skeið í Noregi með Kongsvinger, Volda og Gjerpen HK Skien. Áður en Sara Dögg fór til Noregs hafði hún leikið með Fjölni upp yngri flokka og upp í meistaraflokk.
Ljóst er að koma Söru Daggar styrkir ÍR-liðið verulega, jafnt í vörn sem sókn, auk reynslu. ÍR kom mörgum á óvart í vor með því að leggja Selfoss í fimm leikja rimmu í umspili Olísdeildar kvenna eftir að hafa hafnað í öðru sæti Grill 66-deildar.
ÍR-liðið er að mestu uppbyggt á uppöldum yngri leikmönnum í bland við nokkra eldri en lítil reynsla er fyrir hendi af leikjum í Olísdeildinni. Sara Dögg er fyrsti liðsauki nýliðanna sem fregnast af.
Þjálfari ÍR er Sólveig Lára Kjærnested fyrrverandi landsliðskona. Hún sleit hásin í rimmunni við Selfoss í vor.
