Brynja Katrín Benediktsdóttir línukona úr Val hefur skrifað undir samning við handknattleiksdeild FH og mun spila með liðinu á komandi tímabili á lánasamningi frá Val, eftir því sem fram kemur í tilkynningu frá FH sem mun eiga lið í Grill 66-deild kvenna á komandi leiktíð.
Brynja Katrín er á 19. aldursári og var í leikmannahópi Vals í 20 leikjum í Olísdeildinni á síðasta keppnistímabili þegar liðið varð Íslandsmeistari og hafnaði í öðru sæti í Olísdeildinni og í Poweradebikarnum.
Brynja Katrín hefur átt sæti í yngri landsliðum Íslands og var m.a. með á HM sumarið 2022 þegar Ísland hafnaði í áttunda sæti og í 19 ára landsliðinu sem tók þátt í EM í síðasta mánuði þegar íslenska liðið hreppti 13. sætið og tryggði sér sæti á HM 20 ára landsliða að ári liðnu.
Árni Stefán Guðjónsson þjálfari FH var annar þjálfara U19 ára landsliðsins á EM 19 ára landsliða og þekkir hann vel til Brynju Katrínar.
