Vonir standa til þess að Reynir Þór Stefánsson leikmaður Fram og U19 ára hafi ekki handarbrotnað í næst síðustu viðureign U19 ára landsliðsins á heimsmeistaramótinu í Króatíu. Reynir Þór lék vaxandi hlutverk með Fram á síðasta keppnistímabili.
Eftir að hafa átt stórleik í fyrri hálfleik gegn Svíum í undanúrslitum forsetabikarsins á fimmtudaginn fékk Reynir Þór högg á höndina í síðari hálfleik. Kom hann ekkert meira við sögu í leiknum og tók ekkert þátt í leiknum við Svartfellinga á föstudaginn um 19. sætið.
Aumur og bólginn
„Elís Þór [Rafnsson sjúkraþjálfari A-landsliðsins karla] skoðaði Reyni Þór í gær. Elli telur að Reynir sé óbrotinn. Engu að síður fer hann í myndatöku við allra fyrsta tækifæri til þess að leita af sér allan grun. Hann er aumur í hendinni og mjög bólginn,“ sagði Heimir Ríkarðsson annar þjálfari U19 ára landsliðsins við handbolta.is síðdegis í gær við komu landsliðsins til landsins.
