- Handknattleiksdómararnir Svavar Ólafur Pétursson og Sigurður Hjörtur Þrastarson dæma síðari viðureign Hannover-Burgdorf og sænska liðsins Ystads IF HF í undankeppni Evrópudeildar karla í handknattleik. Leikurinn fer fram í Hannover í Þýskalandi sunnudaginn 3. september.
- Svavar og Sigurður dæmdu nokkra leiki í Evrópudeild karla á síðasta keppnistímabili. Þess má geta til viðbótar að Heiðmar Felixson er aðstoðarþjálfari Hannover–Burgdorf en liðið er að taka þátt í Evrópukeppni í fyrsta sinn.
- Handknattleiksmaðurinn Egill Már Hjartarson hefur æft með nýliðum Olísdeildar, Víkingi, síðustu vikur án þess þó að hafa skrifað undir samning við félagið.
- Egill Már lék við góðan orðstír með StÍF í Færeyjum á síðustu leiktíð en kaus að koma heim í vor. Hann varð í 13. sæti yfir markahæstu leikmenn færeysku úrvalsdeildarinnar á síðustu leiktíð með 75 mörk. Auk þess var Egill Már með bestu vítanýtingu allra í deildinni, 85%. Áður en Egill Már fór til Færeyja hafði hann m.a.leikið með Aftureldingu, Stjörnunni og Fjölni hér heima.
- Teitur Örn Einarsson skoraði eitt mark í tíu marka sigri Flensburg á danska liðnu SønderjyskE, 33:23, í æfingaleik í Danmörku í gær. Yfirburðir Flensburg voru miklir í leiknum. Liðið var átta mörkum yfir í hálfleik, 15:7. Næsti leikur Teits Arnar og félaga verður við Aalborg Håndbold annað kvöld í Álaborg. Uppselt er á leikinn, 5.500 aðgöngumiðar eru seldir.
- Sveinbjörn Pétursson, markvörður, og samherjar hans í þýska 2. deildarliðinu EHV Aue töpuðu í gær fyrir Empor Rostock í æfingaleik í Rostock, 31:28, eftir að hafa verið tveimur mörkum yfir í hálfleik, 18:16. Ekki fylgir sögunni hvernig Sveinbirni gekk í markinu.
- Tumi Steinn Rúnarsson og félagar í Coburg töpuðu fyrir 1. deildarliði Stuttgart í æfingaleik í gær, 34:30. Coburg leikur í 2. deild á komandi leiktíð eins og undanfarin ár.
- Sélestat, liðið sem Grétar Ari Guðjónsson markvörður leikur með í Frakkland, lagði RTV Basel örugglega í æfingaleik í gær, 31:22.
- Örn Vésteinsson Östenberg og liðsmenn Lübeck-Schwartau töpuðu fyrir Hildesheim, 30:24, í æfingaleik í gær. Lübeck-Schwartau hefur vegnað illa á undirbúningstímabilinu.
- Auglýsing -