Arna Valgerður Erlingsdóttir hefur verið ráðin aðalþjálfari kvennaliðs KA/Þórs sem leikur í Olísdeildinni á næstu leiktíð. Þetta er staðfest á heimasíðu KA í dag en bæði Akureyri.net og handbolti.is höfðu sagt frá væntanlegri ráðningu Örnu Valgerðar í sumar.
Egil Ármann með styrkinn
„Arna Valgerður er öllum hnútum kunnug hjá okkur og hefur frá unga aldri þjálfað yngriflokka KA/Þórs auk þess að leika með liðinu. Sem leikmaður lék Arna alls 138 leiki í deild og bikar fyrir KA/Þór og var valin í A-landslið Íslands. Arna tók við sem aðalþjálfari liðsins fyrr í sumar og hefur undirbúningurinn fyrir komandi tímabil farið vel af stað en ásamt ráðningunni á Örnu höfum við ráðið Egil Ármann Kristinsson sem styrktarþjálfara liðsins,“ segir m.a. í tilkynningu KA.
Leiðir uppbyggingu
„Við erum einstaklega ánægð með að fá Örnu til starfa hjá okkur. Þegar Andri Snær sagði upp störfum var Arna strax mjög ofarlega á blaði hjá okkur. Hún hefur starfað lengi hjá félaginu, veit hvað við stöndum fyrir og er gríðarlega hæfileikaríkur þjálfari, það þekki ég af eigin raun eftir að hafa starfað með henni lengi. Við erum í ákveðnum uppbyggingafasa og við teljum Örnu vera frábæran kost til að leiða okkar unga og efnilega lið upp á næsta þrep,“ er haft eftir Stefáni Guðnasyni formanni kvennaráðs KA/Þórs í áðurnefndri tilkynningu.
Fyrsti leikur KA/Þórs í Olísdeildinni verður gegn deildar- og bikarmeisturum ÍBV í KA-heimilinu laugardaginn 9. september.
Leikjadagskrá Olísdeildar kvenna.
Þjálfarar – helstu breytingar 2023
