Óðinn Þór Ríkharðsson og samherjar hans í svissneska meistaraliðinu Kadetten Schaffhausen hófu keppnistímabilið í dag á sama hátt og þeir luku því síðasta, þ.e. á sigri. Kadetten vann HC Kriens, 33:27, í meistarakeppninni sem markar upphaf keppnistímabilsins í Sviss, eins og víða annarstaðar.
Óhætt er að segja að Óðinn Þór hafi tekið upp þráðinn þar sem frá var horfið á síðasta tímabili þegar hann var markahæsti leikmaður liðsins og markakóngur Evrópudeildarinnar. Hann varð markahæstur leikmanna Kadetten í leiknum með 8 mörk, þar af 4 úr vítaköstum. Óðinn geigaði aðeins á einu skoti í leiknum.
Kadetten var með tveggja marka forskot í hálfleik, 15:13, eftir að lið HC Kriens hafði byrjað betur og verið m.a. 8:6 yfir. Andy Schmid var ekki í leikmannahópi HC Kriens í leiknum og var sannarlega skarð fyrir skildi. Hann meiddist í æfingaleik við Rhein-Neckar Löwen í Þýskalandi á dögunum.
Kadetten Schaffhausen varð meistari í Sviss í vor en HC Kriens vann bikarkeppnina.
