„Eftir tvo mjög lélega leiki í röð þá tókst okkur núna að leika mjög góðan varnarleik en því miður þá fórum við svolítið illa með færin okkar. Þar af leiðandi náðum við ekki í að minnsta kosti annað stigið,“ sagði Guðfinnur Kristmannsson annar þjálfara HK eftir naumt tap fyrir FH, 24:22, í Olísdeildinni í handknattleik karla í Kaplakrika í kvöld.
„Við áttum sannarlega möguleika á að ná öðru stiginu en við fórum ekki nógu vel með færin undir lokin til þess að sú yrði raunin. Á móti kemur að það var ánægjulegt að sjá menn koma til baka.
Það er gott fyrir framhaldið og sálina hjá okkur að vita að við getum leikið jafn vel í vörninni og við gerðum í kvöld þótt það hafi ekki skilað okkur stigum. Það eru 10 dagar í næsta leik og á þeim tíma mega menn ekki gleyma því hvernig við viljum leika og með hvaða hugarfari við viljum mæta andstæðingum okkar,“ sagði Guðfinnur Kristmannsson í stuttu samtali við handbolta.is.
Selfyssingar mæta í Kórinn
Úr því að Guðfinnur minnist á næsta leik HK-inga þá er rétt að láta það fljóta með að umræddur leikur HK verður við Selfoss í Kórnum laugardaginn 21. október.
Tengt efni:
Alltof margt sem var alls ekki í lagi hjá okkur
FH slapp fyrir horn gegn baráttuglöðu liði HK
