Athyglisvert er að lesa í nýjustu fundargerð aganefndar HSÍ að tveimur málum hafi verið vísað frá vegna þess að skriflegar skýrslur frá dómurum bárust ekki nefndinni í tíma. Bæði mál snerta útilokanir í kappleik vegna ódrengilegrar hegðunar.
Um er ræða atvik sem átti sér stað í leik Víðis Garði og Hvíta riddarans sem fram í 2. deild karla 2. okótber. Alexander Már Sigurgeirsson, leikmaður Víðis, og Daníel Þór Knútsson leikmaður Hvíta riddarans voru útilokaðir með skýrslu vegna ódrengilegrar hegðunar, eins og segir í fundargerð aganefndar frá í gær.
Í tilfellum beggja leikmanna segir í fundargerðinni: „Dómarar meta að brotið falli undir reglu 8:10 a). Skrifleg skýrsla dómara barst aganefnd ekki innan þess frests sem tilgreindur er í 1. mgr. 3. gr. reglugerðar HSÍ um agamál. Með vísan til heimildar í 3. mgr. sömu greinar er málinu vísað frá nefndinni, þar sem skýrslan barst ekki fyrir fund nefndarinnar þann 3. október sl.“
Guðbjörn Ólafsson dæmdi viðureign Víðis og Hvíta riddarans. Hver dæmdi með honum er á huldu. Sá sem skráður er dómari leiksins í leikskýrslu á vef HSÍ ásamt Guðbirni segir í tölvupósti til handbolta.is hafa verið veikur og ekki dæmt leikinn.
Fundargerð aganefndar HSÍ frá 10. október 2023 má lesa hér fyrir neðan.
