- Liðsmenn Nordsjælland sem Halldór Jóhann Sigfússon þjálfar gerðu sér lítið fyrir og lögðu Danmerkurmeistara GOG, 32:30, í dönsku úrvalsdeildinni í gær. Leikurinn fór fram á heimavelli Nordsjælland. Þó margt hafi gengið á afturlöppunum hjá GOG fram til þessa á tímabilinu verða þessi úrslit að teljast mjög óvænt enda aðeins um þriðja sigur Nordsjælland að ræða tímabilinu í níu leikjum.
- Nordsjælland er byggt upp á ungum leikmönnum og hefur hvað minnst fé á milli handanna af liðum dönsku úrvalsdeildarinnar. Nordsjælland færðist upp um eitt sæti, í það tólfta, með þessum sigri.
- Teitur Örn Einarsson var markahæstur há Flensburg með sjö mörk auk einnar stoðsendingar þegar Flensburg vann Balingen-Weilstetten, 32:28, í þýsku 1. deildinni í handknattleik í gær. Leikurinn fór fram í Flens-Arena. Oddur Gretarsson skoraði eitt mark úr vítakasti fyrir Balingen. Daníel Þór Ingason skoraði einnig einu sinni.
- Ómar Ingi skoraði einnig sjö mörk, þar af fimm úr vítaköstum, þegar Magdeburg lagði Hannover-Burgdorf, 31:29, á heimavelli. Ómar Ingi átti einnig þrjár stoðsendingar. Janus Daði Smárason skoraði ekki mark fyrir Magdeburg að þessu sinni. Heiðmar Felixson er aðstoðarþjálfari Hannover-Burgdorf.
- Magdeburg er komið upp í annað sæti þýsku 1. deildarinnar með 15 stig eftir níu leiki. Flensburg er í fjórða sæti og Hannover-Burgdorf er í áttunda sæti. Balingen er næst neðst. Stöðuna í þýsku 1. deildinni og fleiri deildum Evrópu er hægt að sjá hér.
- Akureyringarnir Dagur Gautason og Hafþór Már Vignisson skoruðu fjögur mörk hvor fyrir ØIF Arendal í 11 marka sigri liðsins á Sandnes, 36:25, á heimavelli í norsku úrvalsdeildinni í handknattleik í gær. ØIF Arendal er með níu stig að loknum sjö leikjum í fjórða sæti.
- Kolstad vann Viking TIF með sömu markatölu og Arendal lagði Sandnes, 36:25, á heimavelli í gær. Sigvaldi Björn Guðjónsson skoraði fjögur mörk fyrir Kolstad. Kolstad situr í öðru sæti norsku úrvalsdeildarinnar með 11 stig eftir sjö leiki. Stöðuna í deildinni er að finna hér.