„Þetta er alveg glatað því við áttum sigurinn svo ógeðslega mikið skilinn,“ sagði vonsvikinn þjálfari Stjörnunnar, Hrannar Guðmundsson, þegar handbolti.is hitti hann að máli eftir jafntefli við FH, 34:34, í upphafsleik 7. umferðar Olísdeildar karla í Mýrinni í kvöld. FH-ingar jöfnuðu metin á allra síðustu sekúndu leiksins.
Yfir allan leikinn
„Ég er mjög pirraður. Mér líður bara eins og ég hafi tapað,” sagði Hrannar og átti erfitt með að halda aftur af tilfinningum sínum.
„Við vorum yfir allan leikinn. Frammistaðan var stórkostleg. Við áttum bara svo innilega skilið að vinna,“ bætti Hrannar við en hann var ánægður með sóknarleik Stjörnunnar enda skoraði liðið 34 mörk.
Hrikalega stoltur
„Vörnin var á köflum góð en á stundum fannst mér við mega fá fleiri varin skot. Ég er hrikalega stoltur af liðinu,“ sagði Hrannar sem vann sitt fyrsta stig með liðinu hvað sem öðru líður en hann var að stýra Stjörnunni í annað sinn í kappleik eftir að hafa tekið óvænt við þjálfun af Patreki Jóhannessyni fyrir níu dögum.
Tengdar fréttir:
Staðan og næstu leikir í Olísdeildum.
