- Auglýsing -
- Kristján Andrésson fyrrverandi landsliðsmaður í handknattleik og þjálfari sænska karlalandsliðsins frá 2016 til 2020 hefur verið ráðinn í stjórnendastarf hjá sænska handknattleiksfélaginu Ludvika HF. Kristján var um árabil þjálfari og síðar starfsmaður Guif í Eskilstuna en hætti hjá félaginu í vor. Bundnar eru miklar vonir við komu Kristjáns til Ludvika HF eftir því sem fram kemur í tilkynningu frá félaginu
- Berta Rut Harðardóttir og samherjar í Kristianstad HK töpuðu í gær öðrum leiknum í röð í sænsku úrvalsdeildinni þegar þær sóttu Skövde heim. Lokatölur 35:30, fyrir Skövde. Berta Rut skoraði eitt mark úr eina markskotinu sem hún átti. Aðeins 12 leikmenn voru á skýrslu hjá Kristianstad HK að þessu sinni. Kristianstad HK er í þriðja til fjórða sæti ásamt Skövde með 8 stig eftir sex umferðir.
- Sävehof og Skuru eru í efstu tveimur sætunum með níu stig hvort auk þess að eiga leik til góða. Stöðuna í sænsku úrvalsdeildinni og fleiri deildum í evrópskum handknattleik er að finna hér.
- Danski landsliðsmaðurinn Simon Pytlick og samherji Teits Arnar Einarsson hjá þýska liðinu Flensburg leikur ekki fleiri leiki með liðinu fyrir áramót. Pytlick meiddist á ökkla um síðustu helgi í leik við HC Erlangen. Meiðslin eru alvarleg. Vonir standa til að Pytlick hafi jafnað sig fyrir Evrópumótið í Þýskalandi í janúar.
- Landi Pytlicks, Aaron Mensing, er sterklega orðaður við Füchse Berlin frá og með næstu leiktíð. Mensing kom til GOG í sumar eftir talsverða veru hjá Flensburg. Mensing er af þýsku og dönsku bergi brotinn og gat valið um með hvoru landsliðinu hann vildi leika. Mensing valdi danska landsliðið en hefur ekki leikið marga landsleiki enda samkeppnin hörð um sæti í liðinu.
- Auglýsing -
