- Auglýsing -
- Elvar Ásgeirsson náði ekki að skora en átti fjórar stoðsendingar þegar lið hans Ribe-Esbjerg lagði TTH Holstebro, 32:29, á heimavelli í dönsku úrvalsdeildinni í handknattleik í gær. Ágúst Elí Björgvinsson fékk ekki langan tíma til að spreyta sig í marki Ribe-Esbjerg og varði ekki skot á þeim stutta tíma. Arnór Atlason er þjálfari TTH Holstebro.
- Fredericia HK, sem Guðmundur Þórður Guðmundsson þjálfar og Einar Þorsteinn Ólafsson leikur með, vann Skanderborg AGF, 30:26, á heimavelli í dönsku úrvalsdeildinni í handknattleik í gær. Einar Þorsteinn átti örugglega frábæran leik með Fredericia HK.
- Fredericia HK er í öðru sæti dönsku úrvalsdeildarinnar með 15 stig að loknum 11 leikjum, fimm stigum á eftir Aalborg Håndbold sem á leik inni. Ribe-Esbjerg er komið upp í þriðja sæti með 14 stig. Arnór og liðsmenn TTH Holstebro sitja í sjöunda sæti.
- Stöðuna í dönsku úrvaldeildinni og í fleiri deildum í evrópskum handknattleik er að finna hér.
- Viktor Gísli Hallgrímsson varði tvö skot á þeim tíma sem hann kom við sögu í marki Nantes í gærkvöld í sigri á Dunkerque í miklum markaleik í Nantes, 41:36. Sem fyrr er Nantes í fjórða sæti deildarinnar með 13 stig, stigi á eftir PSG, Montpellier og Toulouse. PSG og Montpellier eiga leik til góða á Nantes og Toulouse.
- Kristján Örn Kristjánsson, Donni, skoraði sjö mörk í þriggja marka sigri PAUC á Limoges á heimavelli, 35:32, í frönsku 1. deildinni í gærkvöld. PAUC situr í fimmta sæti deildarinnar með 10 stig í átta leikjum.
- Donni er í níunda sæti yfir markahæstu leikmenn frönsku 1. deildarinnar með 47 mörk í átta leikjum, 5,88 mörk að jafnaði í leik. Taka verður tillit til þess að hann tekur ekki vítaköst PAUC-liðsins, Gabriel Leosch, samherji Donna, er markahæstur með 54 mörk.
- Stöðuna í frönsku 1. deildinni og í fleiri deildum í evrópskum handknattleik er að finna hér.
- Grétar Ari Guðjónsson varði eitt skot af þremur sem hann fékk á sig í gærkvöld þegar lið hans Sélestat vann Massy, 32:23, í frönsku 2. deildinni í handknattleik í gær. Sélestat situr í þriðja sæti deildarinnar með 12 stig að loknum átta leikjum. Pontault er efst með 16 stig og Tremblay er þar næst með 14 stig á leik til góða.
- Auglýsing -
