Afturelding og FH unnu fyrstu tvo leikina í níundu umferð Olísdeildar karla í handknattleik í kvöld þegar flautað til leiks á ný í deildinni eftir nærri tveggja vikna hlé vegna landsliðsæfinga og leikja. Afturelding lagði KA í KA-heimilinu, 29:25, eftir að hafa verið fjórum mörkum yfir að loknum fyrri hálfleik, 14:10. Mosfellingar hafa þar með náð saman 13 stigum og sitja eftir sem áður í þriðja sæti deildarinnar.
Aron Pálmarsson og Jón Bjarni Ólafsson voru stórkostlegir í uppgjöri Hafnarfjarðarliðanna á Ásvöllum. Þeir fóru fyrir FH-liðinu sem vann með þriggja marka mun, 32:29, eftir að hafa lengi vel verið skrefi á undan, ekki síst í síðari hálfleik. Haukar voru tveimur mörkum undir í hálfleik, 16:14. Þeir misstu aðeins tökin á sínum leik framan af fyrri hálfleik. FH náði fimm marka forskoti sem Haukar reyndu til hins ítrasta að vinna upp. Allt kom fyrir ekki.
Fjöldi fólks og rífandi stemning
Vel á annað þúsund manns voru á skemmtilegum leik á Ásvöllum í alveg hreint rífandi góðri stemningu. Leikurinn var í opinni dagskrá á aðalrás Símans. Öllu var tjaldað til í tilefni dagsins enda ævinlega hátíðisdagur í handboltanum þegar Hafnafjarðarliðin leiða saman kappa sína.
Eftir tvö Haukamörk í röð undir lokin þá tryggði Aron FH sigurinn með 31. markinu, 31:28, þegar mínúta var til leiksloka. Aron skoraði fimm mörk átti 16 sköpuð færi, þar af 13 stoðsendingar í leiknum samkvæmt HB Statz. Flestar sendingarnar voru á heljarmennið Jón Bjarna Ólafsson línumann. Hann skoraði 10 mörk í 11 skotum og komu Haukar engum böndum á piltinn sem mun lyfta 190 kílóum í bekkpressu.
Minnti samvinna Arons og Jón Bjarna í kvöld á samvinnu Axels Axelssonar og Björgvins Björgvinssonar hjá Fram og landsliðinu á áttunda áratug síðustu aldar.
Á brattann að sækja
Heldur var á brattann að sækja fyrir KA-menn gegn Aftureldingarmönnum í kvöld. Þeim tókst þó að minnka muninn í eitt mark oftar en einu sinni eftir miðjan síðari hálfleik. Einar Rafn Eiðsson jafnaði metin, 23:23, þegar átta mínútur voru til leiksloka. Þá sögðu Mosfellingar, hingað og ekki lengra!
Árni Bragi Eyjólfsson lék við hvern sinn fingur í KA-heimilinu og lék sinn besta leik í vetur fyrir Aftureldingu. Hann skoraði 12 mörk.
Staðan og næstu leikir í Olísdeildum.
KA – Afturelding 25:29 (10:14).
Mörk KA: Einar Rafn Eiðsson 8/2, Jóhann Geir Sævarsson 4, Ólafur Gústafsson 3, Ott Varik 3, Einar Birgir Stefánsson 3, Dagur Árni Heimisson 2, Arnór Ísak Haddsson 1, Skarphéðinn Ívar Einarsson 1.
Varin skot: Bruno Bernat 14/1, 34,1% – Nicolai Horntvedt Kristensen 1, 33,3%.
Mörk Aftureldingar: Árni Bragi Eyjólfsson 12/2, Þorsteinn Leó Gunnarsson 5, Bergvin Þór Gíslason 3, Birkir Benediktsson 2, Ihor Kopyshynskyi 2, Blær Hinriksson 2, Þorvaldur Tryggvason 2, Leó Snær Pétursson 1/1.
Varin skot: Brynjar Vignir Sigurjónsson 8, 33,3% – Jovan Kukobat 5, 35,7%.
Haukar – FH 29:32 (14:16).
Mörk Hauka: Guðmundur Bragi Ástþórsson 5/2, Þráinn Orri Jónsson 5, Geir Guðmundsson 4, Ólafur Ægir Ólafsson 3, Guðmundur Hólmar Helgason 3, Adam Haukur Baumruk 3, Brynjólfur Snær Brynjólfsson 2, Úlfur Gunnar Kjartansson 2, Össur Haraldsson 2.
Varin skot: Aron Rafn Eðvarðsson 12/1, 27,9%.
Mörk FH: Jón Bjarni Ólafsson 10, Aron Pálmarsson 5, Einar Örn Sindrason 4/3, Ásbjörn Friðriksson 4/2, Jakob Martin Ásgeirsson 3, Jóhannes Berg Andrason 3, Birgir Már Birgisson 2, Símon Michael Guðjónsson 1.
Varin skot: Daníel Freyr Andrésson 13/1, 31%.
Staðan og næstu leikir í Olísdeildum.
FH-ingar voru einfalega betri að þessu sinni
Slökuðu aldrei á – héldu alltaf áfram að sækja
Myndskeið: Var tækifæri til þess að vinna
Myndskeið: Sterkt hjá okkur að fara heim með tvö stig
