Síðasta umferð ársins í Olísdeild kvenna hefst í kvöld með þremur leikjum. Einnig verður haldið áfram að fækka liðum sem standa eftir í Poweradebikar karla. Ein viðureign fer fram í keppninni í kvöld. Til viðbótar verður leikur í Grill 66-deild kvenna. Liðin í fimmta og sjötta sæti, FH og HK, opna áttundu umferð deildarinnar í Kaplakrika.
Vegna undirbúnings og síðar þátttöku kvennalandsliðsins á HM sem hefst undir mánaðarlok verður gert hlé á Olísdeild kvenna fram yfir áramót þegar 10. umferð verður að baki annað kvöld með leik Aftureldingar og Hauka að Varmá. Í kvöld er hinsvegar þrír leikir á dagskrá. Valur og ÍBV mætast í Heimaey klukkan 18.
Ókeypis aðgangur í KA-heimilinu
Á sama tíma verður flautað til leiks í KA-heimilinu þegar ÍR-ingar sækja liðsmenn KA/Þórs heim. Bílaleiga Akureyrar býður fólki á völlinn og má reikna með að margir nýta sér gott tækifæri til að fylgjast með skemmtilegum handboltaleik. Einnig verður hátíðartilboð á hamborgurum og gosdrykkjum.
Þriðja viðureignin í Olísdeild kvenna í kvöld verður á milli Fram og Stjörnunnar á heimavelli Fram í Úlfarsárdal. Stjarnan ætlar sér væntanlega að leita hefnda eftir 10 marka tap í fyrsta leik liðanna sem fram fór í Mýrinni í haust.
Annar háspennuleikur?
Olísdeildarliðin Afturelding og HK mætast í 16-liða úrslitum Poweradebikars karla í handknattleik að Varmá klukkan 19.30. Margir minnast ævintýralegrar viðureignar liðanna í 16-liða úrslitum keppninnar á síðasta ári. Úr varð sannkölluð maraþonviðureign. Úrslitin réðust ekki fyrr en í vítakeppni eftir tvær framlengingar. Afturelding vann leikinn, 44:43, og lenti ekki í krappari dans á leið sinni að sigri í Poweradebikarnum nokkrum mánuðum síðar.
Leikir kvöldsins
Olísdeild kvenna:
Vestmannaeyjar: ÍBV – Valur, kl. 18.
KA-heimilið: KA/Þór – ÍR, kl. 18.
Úlfarsárdalur: Fram – Stjarnan – sýndur í sjónvarpi Símans í opinni dagskrá.
Staðan og næstu leikir í Olísdeildum.
Poweradebikar karla, 16-liða úrslit:
Varmá: Afturelding – HK, kl. 19.30 – sýndur á RÚV2.
Grill 66-deild kvenna:
Kaplakriki: FH – HK, kl. 19.30.
Staðan og næstu leikir í Grill 66-deildum.
– Allir leikir kvöldsins að viðureign Aftureldingar og HK undanskilinni verða sendir út á handboltapassa HSÍ eða í sjónvarpi Símans.
