Rúmur sólarhringur er í fyrsta leik íslenska landsliðsins á heimsmeistaramótinu í handknattleik kvenna. Landsliðið æfði saman í keppnishöllinni, DNB-Arena, í hádeginu í dag. DNB-Arena í Stafangri rúmar á fimmta þúsund áhorfendur. Auk góðrar upphitunar var farið yfir helstu atriði sem lögð verður áhersla á í leiknum við Slóvena sem verður fyrsti andstæðingur íslenska landsliðsins.
Halda spilunum þétt að sér
Lítið er vitað um Slóvena. Þeir hafa haldið spilunum þétt að sér í undirbúningi fyrir mótið og t.d. ekki leikið neina opinbera æfingaleiki. Ljóst er þó að innan raða liðsins eru mjög sterkir leikmenn eins og t.d. Ana Gros sem nú um stundir er félagsbundin ungverska stórliðinu Györ. Hún hefur margoft orðið markahæsti leikmaður Meistaradeildar Evrópu. Frábær örvhent skytta sem er ekkert lamb að leika við.
Víst er að Slóvenar eru með öflugt lið. Þeir voru m.a. andstæðingur íslenska landsliðsins í umspili fyrir HM 2021. Munaði þá talsverðu á liðunum og m.a. unnu Slóvenar heimaleik sinn með 10 marka mun, 24:14. Leikurinn heima á Íslandi var jafnari.
Hverjar eru konurnar 18 í fyrsta HM-hópnum í 12 ár?
Þrautreyndur þjálfari
Landsliðsþjálfari Slóvena er Svartfellingurinn Dragan Adzic sem var landsliðsþjálfari Svartfjallalands um árabil m.a. á HM 2011 þegar Ísland lagði Svartfellinga mjög óvænt í upphafsleik þjóðanna. Adzic stýrði Svartfellingum til sigurs á EM árið eftir og var einnig þjálfari Buducnost í heimalandi sínu um árabil með frábærum árangri. Adzic stýrði slóvenska landsliðinu í fyrsta sinn í umspilsleikjunum við Ísland vorið 2021 sem áður er getið.
Hér fyrir neðan eru nokkrar myndir frá æfingu íslenska landsliðsins í DNB-Arena í dag
