- Auglýsing -
- Stórleikur Sveinbjörns Péturssonar markvarðar með EHV Aue í gærkvöld gegn Bietigheim nægði liðinu ekki til þess að krækja í stig á heimavelli. Sveinbjörn varði 19 skot, 38%.
- Bietigheim vann með fjögurra marka mun, 31:27, er í öðru sæti deildarinnar með 24 stig, stigi á eftir Potsdam. Aue rekur lestina í 2. deild með fjögur stig en Ólafur Stefánsson tók við þjálfun Aue í síðasta mánuði.
- Króatinn Domagoj Duvnjak hefur framlengt samning sinn við þýska meistaraliðið THW Kiel til ársins 2025. Duvnjak hefur verið fyrirliði Kiel síðustu árin. Hann er 35 ára gamall og kom til félagsins 2014 eftir að hafa áður verið í fimm ár hjá HSV Hamburg. Alls eru leikir Krótans fyrir Kiel orðnir 547 og mörkin 1.413.
- Annar gamall refur í handboltanum, Daninn Henrik Møllgaard, hefur ákveðið að dvelja áfram hjá Aalborg. Hann skrifaði nýverið undir nýjan samning sem gildir fram á mitt árið 2025. Møllgaard sem er 38 ára gamall hefur verið í herbúðum Álaborgarliðsins frá 2018 auk þess að leika yfir 200 landsleiki fyrir Danmörku á síðustu 18 árum.
- Danski handknattleiksmaðurinn Morten Olsen er ekki af baki dottinn þótt GOG hafi leyst hann undan samningi á dögunum. Hann samdi í gær við Bjerringbro/Silkeborg, mörgum að óvörum. Hann lék síðast með liði félagsins frá 2007 til 2010.
- Auglýsing -
