- Mikkel Hansen tryggði Aalborg Håndbold annað stigið gegn Fredericia HK þegar tvö efstu liðs dönsku úrvalsdeildarinnar mættust í thansen ARENA í Fredericia í gærkvöld, 32:32. Hansen skoraði úr vítakasti. Guðmundur Þórður Guðmundsson er þjálfari Fredericia og Einar Þorsteinn Ólafsson leikur með liðinu.
- Þegar þrjár umferðir eru eftir er Aalborg efst með 40 stig eftir 23 leiki. Fredericia hefur 35 stig, er fimm stigum á undan Bjerringbro/Silkeborg. Stöðuna í dönsku úrvalsdeildinni og í fleiri deildum evrópsks handknattleiks er að finna hér.
- Arnar Birkir Hálfdánsson og félagar í Amo HK unnu mikilvægan sigur í neðri hluta sænsku úrvalsdeildarinnar í gær þegar þeir lögðu Lugi, 28:25, á heimavelli. Arnar Birkir skoraði tvö mörk. Amo situr í 10. sæti þegar þrjár umferðir eru eftir. Takist liðinu að halda a.m.k. 10. sæti þá sleppur það við umspilskeppni með liðum neðri hlutans um að forðast fall.
- Ekki gengur eins vel hjá HF Karlskrona í sænsku úrvalsdeildinni í karlaflokki en nokkrir Íslendingar leika með liði félagsins. Karlskrona tapaði í gær fyrir Malmö, 28:22, á útvelli og er í 12. sæti af 14 liðum. Dagur Sverrir Kristjánsson skoraði eitt mark fyrir Karlskrona en Ólafur Andrés Guðmundsson og Þorgils Jón Svölu Baldursson tókst ekki að skora. Phil Döhler markvörður freistaði þess að verja eitt vítakast en án árangurs.
- Hákon Daði Styrmisson skoraði eitt mark fyrir Eintracht Hagen þegar liðið tapaði fyrir Nordhorn-Lingen, 39:37, á útivelli í þýsku 2. deildinni í handknattleik í gær. Eintracht Hagen er í fjórða sæti deildarinnar með 28 stig eftir 23 leiki.
- Stöðuna í sænsku úrvalsdeildinni, 2. deild þýska handknattleiksins í karlaflokki og í fleiri deildum evrópsks handknattleiks er að finna hér.
- Hinn þrautreyndi sænski handknattleiksmaður Kim Andersson hefur skrifað undir nýjan eins árs samning við Ystads IF til ársins 2025. Andersson er 42 ára gamall og hefur verið hjá Ystads IF í níu ár.
- Auglýsing -