„Frammistaða okkar var hrikalega góð, ekki síst varnarleikurinn enda höfðum við búið okkur mjög vel undir leikinn. ÍR-ingar skoruðu ekki nema tvö mörk í fyrri hluta fyrri hálfleiks og það úr vítaköstum. Það segir sína sögu,“ sagði Sigurgeir Jónsson, Sissi, þjálfari Stjörnunnar eftir sigurinn á ÍR, 28:23, í næst síðustu umferð Olísdeildar í Skógarseli, heimavelli ÍR í gær. Með sigrinum tryggði Stjarnan sér sjötta sæti fyrir lokaumferðina á laugardaginn og þar með þátttökurétt í úrslitakeppninni.
„Okkur heppnaðist að halda ÍR-ingum niðri lengst af og tókst að sigla heim með afar öruggan og mikilvægan sigur sem skiptir miklu máli fyrir okkur,“ sagði Sissi.
„Stjörnuliðið hefur vaxið stöðugt eftir áramót þótt alltaf sé það nú svo að betur má gera. Ég er bara fyrst og fremst ánægður með hvernig liðið svaraði í þessum mikilvæga leik því ÍR er með hörkulið sem er nokkrum stigum fyrir ofan okkur. Það er því mjög sterkt að vinna ÍR á útivelli í mikilvægum leik,“ sagði Sigurgeir Jónsson þjálfari Stjörnunnar í samtali við handbolta.is í Skógarseli í gærkvöld.
ÍR – Stjarnan 23:28 (10:15).
Mörk ÍR: Sara Dögg Hjaltadóttir 9/2, Katrín Tinna Jensdóttir 3, Karen Tinna Demian 3/2, Ásthildur Bertha Bjarkadóttir 3, Hanna Karen Ólafsdóttir 2, Sylvía Sigríður Jónsdóttir 2, Matthildur Lilja Jónsdóttir 1.
Varin skot: Hildur Öder Einarsdóttir 7/1, 20%.
Mörk Stjörnunnar: Embla Steindórsdóttir 7, Eva Björk Davíðsdóttir 7/2, Helena Rut Örvarsdóttir 5/2, Hanna Guðrún Hauksdóttir 2, Guðmunda Auður Guðjónsdóttir 2, Anna Karen Hansdóttir 2, Vigdís Arna Hjartardóttir 1, Stefanía Theodórsdóttir 1, Elísabet Gunnarsdóttir 1.
Varin skot: Darija Zecevic 15, 40,5%.
Öll tölfræði leiksins hjá HBStatz.
Staðan og næstu leikir í Olísdeildum.
