„Ég er svo ótrúlega ánægð með að vinna leikinn og tryggja þannig annað sæti riðilsins á sannfærandi hátt,” sagði Þórey Rósa Stefánsdóttir leikreyndasti leikmaður íslenska landsliðsins um þessar mundir þegar handbolti.is hitti hana í sjöunda himni eftir að landsliðið vann það færeyska, 24:20, og vann sér sæti í lokakeppni EM í fyrsta sinn í 12 ár. Þórey Rósa er sú eina í landsliðinu í dag sem var með í lokakeppni EM 2012 í Serbíu.
Hækkun vonandi um flokk
„Það var afar mikilvægur áfangi hjá okkur að náð öðru sæti riðilsins, brjóta með því ísinn, hækka okkur um styrkleikaflokk og standa vonandi þar með betur að vígi þegar dregið verður í riðla lokakeppninnar 18. apríl,” sagði Þórey Rósa sem lék sinn 137. landsleik í dag. Hún er fjórða leikjahæst landsliðskona Íslands í handknattleik.
„Þetta var mikill iðnaðarsigur hjá okkur í dag. Elín Klara fór fyrir okkar sóknarleik. Hún er ótrúlega flott handboltakona. Elín Jóna í markinu var líka stórkostleg,” sagði Þórey Rósa sem ekki aðeins var ánægð fyrir hönd íslenska landsliðsins heldur einnig sagði hún gaman að vera vitni að því þegar leikmenn færeyska landsliðsins fengu fullvissu um að þær hefðu einnig innsiglað sér þátttökurétt á EM í fyrsta sinn í sögunni. Færeyingar fara inn á EM sem eitt af fjórum liðum sem eru í þriðja sæti í riðli með besta árangri í undankeppninni.
Verðskuldað hjá Færeyingum
„Færeyska liðið er mjög flott með margra frábæra leikmenn og eiga svo sannarlega skilið að komast á EM. Ég óska þeim innilega til hamingju,” sagði Þórey Rósa Stefánsdóttir hin þrautreynda landsliðskona í samtali við handbolta.is.
