„Við litum hroðalega illa út í fyrri hálfleik. Hugarfarið var lélegt,“ sagði Einar Jónsson þjálfari Fram í samtali við handbolta.is eftir 18 marka tap fyrir Val í fyrstu viðureign liðanna í átta liða úrslitum Olísdeildar karla í handknattleik í N1-höllinni í kvöld, 41:23. Segja má að leiknum hafi verið nánast lokið eftir stundarfjórðung þegar Valur var kominn með níu marka forskot.
„Hverju er um að kenna er ekki gott að segja. Ég trúi því ekki að menn hafi verið stressaðir. Þetta var bara hrein hörmung,“ sagði Einar sem er ekki öfundsverður af hlutverki sínu um þessa mundir vegna þess að margir leikmenn Fram eru á sjúkralista.
Liðin mætast aftur í Lambhagahöllinni á laugardaginn klukkan 14 og segir Einar menn verða að gera betur þótt sannarlega verði við ramman reip að draga gegn fullskipuðu liði Vals.
Lengra viðtal er við Einar í myndskeiðinu hér fyrir neðan en handbolti.is er að þreifa sig áfram með myndskeiðsviðtöl til að svara kröfum nútímans að einhverju leyti.
Sjá einnig:
