Strákarnir í hlaðvarpsþættinum Handboltinn okkar settust niður í hljóðverið sitt og tóku upp sinn 50. þátt en að þessu sinni ræddu þeir um 16.umferðina í Olísdeild karla. Hæst bar í þessari umferð óvæntur sigur Þórs á Val. Þeir félagar hrósuðu norðanmönnum mjög fyrir hvernig þeir mættu í þennan leik og voru sérstaklega ánægðir með framlagið hjá Karolis Stropus í þessum leik. Að sama skapi voru þeir fyrir miklum vonbrigðum með lið Vals en þeir félagar telja þá vera ein mestu vonbrigði vetrarins.
Kvartettinn er á þeirri skoðun að Haukar séu með yfirbuðarlið í deildinni á þessu tímabili og þeir sjá hreinlega ekki hvaða lið ætli sér að koma í veg fyrir að þeir verði Íslandsmeistarar.
Þá fóru þeir yfir hvað væri framundan í Olísdeild karla og völdu hvaða leikmenn koma til greina sem BK leikmaður 16. umferðar. Þeir sem eru tilnefndir að þessu sinni eru, Björgvin Hólmgeirsson, Stjörnunni, Jovan Kukobat, Þór Ak., Ólafur Ægir Ólafsson, Haukum, Vilius Rasimas, Selfoss og Kári Kristján Kristjánsson, ÍBV.
Hægt er hlusta á þáttinn með því að smella á örina neðst í hægra horninu hér fyrir neðan.
