- Færeyski landsliðsmaðurinn Vilhelm Poulsen sem lék með Fram frá 2020 til 2022 við góðan orðstír hefur samið við Hannover-Burgdorf frá og með næstu leiktíð. Vilhelm hefur leikið með Lemvig undanfarin tvö ár eftir að hann fór frá Fram. Lemvig féll úr dönsku úrvalsdeildinni í vor. Vilhelm á að fylla skarð Svartfellingsins Branko Vujovic sem rær á ný handknattleiksmið í sumar. Heiðmar Felixson er aðstoðarþjálfari Hannover-Burgdorf sem er í 6. sæti þýsku 1. deildarinnar.
- Guðlaugur Arnarsson hefur látið af störfum aðstoðarþjálfara karlaliðs KA í handknattleik sem hann hefur sinnt um nokkurra ára skeið. Honum voru færðar þakkir á uppskeruhátíð KA á miðvikudagskvöld.
- Axel Stefánsson og liðsmenn hans í norska úrvalsdeildarliðinu Storhamar leika í dag til undanúrslita í Evrópudeildinni í handknattleik kvenna gegn franska liðinu Nantes. Leikið verður í Raiffeisen Sportpark í Graz í Austurríki eins og á síðasta ári. Axel er annar tveggja þjálfara Storhamar.
- Í hinni viðureign undanúrslita Evrópudeildar kvenna eigast við rúmensku liðin H.C. Dunărea Brăila og CS Gloria 2018 BN. Eflaust muna einhverjir eftir því að H.C. Dunărea Brăila kom hingað til lands í október og mætti Íslandsmeisturum Vals í 1. umferð keppninnar og vann með eins marks mun, 30:29. Síðari leikurinn í Rúmeníu var ójafnari en hann vann H.C. Dunărea Brăila með 16 mörkum, 30:14.
- Sigurliðin í undanúrslitaleikjunum í dag leika til úrslita á morgun en tapliðin kljást um bronsverðlaunin. Danska liðið Ikast vann Evrópudeild kvenna á síðasta tímabili.