Akureyringurinn Axel Stefánsson þjálfari norska liðsins Storhamar komst í dag í með lið sitt í úrslit Evrópudeildarinnar í handknattleik kvenna. Storhamar vann franska liðið Nantes, 28:27, í æsilega spennandi undanúrslitaleik í Raiffeisen Sportpark í Graz í Austurríki. Storhamar mætir rúmenska liðinu CS Gloria 2018 BN í úrslitaleiknum sem fram fer á morgun.
Nantes var fjórum mörkum yfir að loknum fyrri hálfleik, 16:12. Leikmenn Storhamar léku frábærlega í síðari hálfleik. Varnarleikurinn var framúrskarandi og jafnt og þétt tókst að snúa leiknum við. Leikmenn Nantes skoruðu síðasta markið en það dugði ekki til.
CS Gloria 2018 BN vann annað rúmenskt lið, H.C. Dunărea Brăila, 37:26, í hinni viðureign undanúrslitanna í Graz í dag. H.C. Dunărea Brăila vann Val í fyrstu umferð Evrópudeildarinnar í október.
H.C. Dunărea Brăila mætir Nantes í leiknum um bronsverðlaunin.
