Harpa Rut Jónsdóttir leikur til úrslita um meistaratitilinn í svissneska handboltanum með samherjum sínum í GC Amicitia Zürich eftir ævintýralegan sigur á Spono Eagles, 39:38, á útivelli í oddaleik í undanúrslitum í gær. Grípa varð til vítakeppni til þess að knýja fram hreinar línu í leiknum. Harpa Rut og félagar unnu, 6:5, í bráðabana vítakeppninnar.
Úrslitin voru frekar óvænt því Spono Eagles hefur verið með annað af tveimur sterkustu kvennaliðum Sviss að undanförnu.
Spono Eagles var með þriggja marka forskot í hálfleik, 15:12. Leikmenn GC Amicitia Zürich börðust eins og ljón allt til enda. Varnarleikur liðsins var frábær í síðari hálfleik. Staðan eftir 60 mínútur var jöfn, 25:25. Framlengingu lauk með jafntefli, 8:8. Þess vegna var vítakeppni ekki umflúin til að ná fram sigri á annan hvorn veginn.
Harpa Rut skoraði eitt mark og var einu sinni vikið af leikvelli.
GC Amicitia Zürich mætir LC Brühl í úrslitaeinvígi um meistaratitilinn. Fyrsta viðureign verður á miðvikudaginn St. Gallen, heimavelli deildarmeistara LC Brühl. Vinna þarf þrjá leiki til þess að verða meistari.
Harpa Rut er frá Akureyri en hefur búið um árabil í Sviss. Hún hefur leikið með GC Amicitia Zürich í tvö ár en var þar á undan með LK Zug og varð m.a. landsmeistari og bikarmeistari með liðinu vorið 2021.