Benedikt Gunnar Óskarsson skoraði næst flest mörk í Evrópubikarkeppninni í handknattleik á keppnistímabilinu sem lauk á laugardaginn með sigri Benedikts og félaga í Val. Grikkinn góðkunni, Savvas Savvas, skoraði flest mörk, 81, og var með 61,8% skotnýtingu. Benedikt Gunnar varð næstur á eftir með 65 mörk, 66,3% skotnýtingu.
Þriðji markahæsti leikmaður Evrópubikarkeppninnar er Ítalinn Tomas Valentin Cante, hjá Brixen með 62 mörk. Cante lék fjórum leikjum færra en Benedikt.
Magnús og Monsi ofarlega
Af öðrum Íslendingum á lista markahæstu leikmanna Evrópubikarkeppninnar er Magnús Óli Magnússon Val í 7. sæti með 48 mörk, skotnýting 65,8%. Úlfar Páll Monsi Þórðarson er þrettándi með 41 mark. Skotnýting Monsa var 78,8%.
Jóhannes Berg í 23. sæti
FH-ingurinn Jóhannes Berg Andrason er í 23. sæti með 34 mörk í sjö leikjum, 58,6% skotnýting. Valsararnir Andri Finnsson og Ísak Gústafsson skoruðu einnig 34 mörk hvor og það í 12 leikjum.
Einar Bragi Aðalsteinnsson, FH, og Valsarinn Tjörvi Týr Gíslason, er marki á eftir þremenningunum í 28. – 30 sæti ásamt Marko Nikolic leikmanni slóvenska liðsins MRK Krka.
