Grétar Ari Guðjónsson og liðsfélagar í Sélestat töpuðu fyrir Istres í undanúrslitum umspils næst efstu deildar franska handknattleiksins í gær, 28:26. Þar með er ljóst að Sélestat leikur ekki í efstu deild franska handknattleiksins á næstu leiktíð. Grétar Ari stóð í markinu allan leikinn og varði sjö skot, þar af eitt vítakast, 21%. Væntanlega var þetta síðasti leikur hans fyrir félagið.
Grétar Ari flytur til Parísar í sumar og gengur til liðs við US Ivry sem leikur í efstu deild. Ivry hafnaði í 13. sæti efstu deildar sem lauk á föstudaginn. Hafnfirðingurinn gekk frá samningi við Ivry í janúar. Hjá Parísarliðinu hittir hann fyrir fyrrverandi samherja úr Haukum, Darra Aronsson.
Tremblay og Istres, sem mætast í úrslitaleik umspilsins í dag, fara upp úr næst efstu deild eftir umspilið og taka sæti Saran og Dijon sem falla í 2. deild.
Sjá einnig:
