Andri Snær Stefánsson hefur verið ráðinn aðstoðarþjálfari meistaraflokks karla hjá KA á næsta handboltavetri og kemur þar með inn í teymið hjá Halldóri Stefáni Haraldssyni aðalþjálfara liðsins. Andri Snær er þrautreyndur þjálfari og leikmaður. Skemmst að minnast þess að hann þjálfaði kvennalið KA/Þórs með frábærum árangri frá 2020 til 2023.
Andri Snær lék í ríflega hálfan annan áratug með KA og Akureyri handboltafélagi KA og Þórs. Alls voru meistaraflokksleikirnir fyrir félögin hátt í 400.
Andri byrjaði snemma í þjálfun yngri flokka hjá KA og tók svo við stjórn ungmennaliðs KA á árunum 2017-2020 þar sem liðið vann sigur í 2. deildinni veturinn 2018-2019 og festi sig í sessi í Grill 66-deildinni tímabilið eftir. Í framhaldinu sneri Andri Snær sér að þjálfun liðs KA/Þórs. Í vetur var Andri Snær þjálfari 5. flokks karla hjá KA.
Guðlaugur Arnarsson sem var aðstoðarþjálfari KA á síðustu leiktíð lét af störfum í vor.
Frekari upplýsingar eru á heimasíðu KA.
Sjá einnig:
Þjálfarar – helstu breytingar 2024
