- Auglýsing -
- Ungverjarnir Adam Biro og Oliver Kiss dæma viðureign SC Magdeburg og THW Kiel um þriðja sæti í Meistaradeild Evrópu í handknattleik í Lanxess Arena í Köln í dag. Flautað verður til leiks klukkan 13. Kiss er Mosfellingum að góðu kunnur en hann var markvörður Aftureldingar í tvö keppnistímabil frá 2007 til 2009 og lék alls 30 leiki á tveimur tímabilum.
- Norður Makedóníumennirnir Slave Nikolov og Gjorgji Nachevski dæma úrslitaleikinn á milli Barcelona og Aalborg Håndbold í Meistaradeildinni. Úrslitaleikurinn hefst klukkan 16 og fer fram í Lanxess Arena. Hægt verður að fylgjast með úrslitaleikjunum tveimur í textalýsingu á handbolti.is og einnig í streymi á ehftv.com.
- Rune Dahmke fyrirliði THW Kiel bað stuðningsmenn liðsins afsökunar á hörmulegri frammistöðu liðsins í undanúrslitaleiknum við Barcelona í undanúrslitum Meistaradeildar karla í handknattleik í gær. THW Kiel tapaði með 12 marka mun, 30:18. Stuðningmenn liðsins komu í þúsundavís til Kölnar til að fylgjast með liðinu. Fannst mörgum sem þeir væru sviknir af framgöngu leikmanna liðsins.
- Elias Ellefsen á Skipagøtu var í gær fyrsti færeyski handknattleiksmaðurinn til þess að taka þátt í úrslitahelgi Meistaradeildarinnar þegar hann lék með Kiel gegn Barcelona. Þar með hafa 406 leikmenn frá 36 þjóðum tekið þátt í úrslitahelgi Meistaradeildarinnar frá 2010. Frakkar eru fjölmennastir, 54. Spánverjar koma þar á eftir alls 51 og í þriðja sæti er Danir með 48 leikmenn.
- Mikkel Hansen hefur tekið þátt í úrslitahelgi Meistaradeildarinnar með fjórum liðum, FC Barcelona, AG København, Paris Saint-Germain og Aalborg Håndbold. Um leið er þetta í áttunda sinn sem hann er með. Hansen hefur aldrei unnið keppnina en e.t.v. verður breyting á í dag.
- Fyrir utan Hansen eru það aðeins Arpad Sterbik og Guðjón Valur Sigurðsson sem tekið hafa þátt í úrslitahelginni frá 2010 með fjórum mismunandi liðum.
- Hansen er orðinn markahæsti leikmaður úrslitahelgarinnar frá upphafi með 73 mörk í 15 leikjum. Aleix Gómez leikmaður Barcelona er aðeins marki á eftir en hefur lokið 14 leikjum. Kiril Lazarov er þriðji með 68 mörk í sjö leikjum. Aron Pálmarsson er fjórði með 59 mörk í 19 leikjum.
- Auglýsing -
