Kvennalið ÍBV í handknattleik hefur fengið liðsauka í Yllka Shatri línukonu fyrir næstu leiktíð. Shatri kemur til félagsins frá Kósovómeisturum KHF Istogu og á að fylla skörð sem línukonurnar Elísa Elíasdóttir og Ásdís Guðmundsdóttir skilja eftir sig. Báðar yfirgefa ÍBV-liðið í sumar.
Shatri er 23 ára og 180 sentímetrar á hæð og sögð kraftmikill línumaður í tilkynningu ÍBV. Þess má til fróðleiks geta að Shatri lék með KHF Istogu í tveimur leikjum gegn KA/Þór í Evrópubikarkeppninni haustið 2021 og skoraði tvö mörk og var einu sinni vikið af leikvelli.
„Við bindum miklar vonir við Yllku og hlökkum til að sjá hana á vellinum,“ segir í tilkynningu ÍBV í morgun.
Sjá einnig:
Elísa skrifar undir þriggja ára samning við Val
Konur – helstu félagaskipti 2024
