- Auglýsing -
- Rúmenska meistaraliðið í handknattleik kvenna, CSM Búkarest, hefur samið við svartfellsku handknattleikskonuna, Djurdjina Jaukovic. Hún er ein margra leikmanna sem yfirgefið hafa ZRK Buducnost á undanförnum vikum eftir að ljóst varð að félagið rambaði á barmi gjaldþrots og mörgum samningum við leikmenn var sagt upp.
- Eftir því sem næst verður komið hefur tekist að forða ZRK Buducnost frá gjaldþroti með aðstoð borgaryfirvalda í höfuðborg Svartfjallalands, Podgorica. Hinsvegar er ljóst að útgjöld félagsins verða skorin niður við trog. Fyrir vikið verður lið ZRK Buducnost ekki svipur hjá sjón, hvað styrkleika varðar. Áfram er þó stefnt á að taka þátt í Meistaradeild Evrópu enda hafa allir reikningar við EHF verið gerðir upp sem er skilyrði fyrir þátttöku.
- Fleiri félög eru í fjárhagsbasli en ZRK Buducnost. Bosníumeistarar RK Borac í handknattleik karla leita í dyrum og dyngjum að peningum inn í reksturinn. Til að bæta gráu ofan á svart hefur stjórn félagsins hótað að segja sig frá störfum fyrir félagið. RK Borac er fornfrægt félag frá þeim árum að Júgóslavía var og hét.
- Auglýsing -
