Arndís Áslaug og Elísabet Ása skrifa undir

Handknattleiksdeild Gróttu hefur gert tveggja ára samninga við Arndísi Áslaugu Grímsdóttur og Elísabetu Ásu Einarsdóttur. Báðar eru þær fæddar árið 2007 og eru leikmenn 3. flokks kvenna.

Arndís tók þátt í 11 leikjum með meistaraflokki í fyrra og Elísabet Ása í tveimur leikjum. Þær hafa æft stíft með meistaraflokki að undanförnu og eru hugsaðar sem framtíðarleikmenn liðsins.

Arndís Áslaug er línumaður og Elísabet Ása er skytta eða leikstjórandi.

„Þær munu vonandi blómstra í vetur í 3. flokki og fá tækifæri með Gróttu í Olísdeildinni,“ segir í tilkynningu frá handknattleiksdeild Gróttu.