- Auglýsing -
- Óðinn Þór Ríkharðsson skoraði sex mörk, þar af þrjú úr vítaköstum, þegar Kadetten Schaffhausen vann BSV Bern á heimavelli í gær í fyrstu umferð A-deildarinnar í Sviss.
- Orri Freyr Þorkelsson og félagar í Sporting leika til úrslita í dag við Barcelona í keppninni um Íberíubikarinn. Sporting vann Bathco BM Torrelavega, 30:27, í undanúrslitum í gær. Barcelona lagði Porto, með Þorstein Leó Gunnarsson innanborðs, 39:31, í hinni viðureign undanúrslita.
- Eftir talsverða leit kom í ljós að Þorsteinn Leó skoraði fjögur mörk fyrir Porto gegn Barcelona. Orri Freyr var ekki á meðal markaskorara Sporting.
- Haukur Þrastarson skoraði ekki mark fyrir Dinamo Búkarest í gær þegar liðið vann CSM Constanta á útivelli með átta marka mun, 34:26, í fyrstu umferð pólsku 1. deildarinnar í handknattleik.
- Ólafur Brim Stefánsson og samherjar hans í Povazska Bystrica fóru vel af stað í slóvakísku úrvalsdeildinni í gær. Þeir unnu Nove Zamky á útivelli, 33:27. Torsótt hefur reynst að finna nánari upplýsingar um leikinn, s.s. um þátttöku Ólafs Brims í leiknum en hann gekk til liðs við félagið í síðasta mánuði.
- Janus Daði Smárason og liðsfélagar í OTP Bank-PICK Szeged hófu keppni í ungversku 1. deildinni í gær af miklum krafti. Þeir unnu QHB Eger á heimavelli, 41:23. Janus Daði kom lítið við sögu og skoraði til að mynda ekki mark.
- Viktor Gísli Hallgrímsson, landsliðsmarkvörður, var ekki í leikmannahópi ORLEN Wisła Płock þegar pólsku meistararnir unnu Wybrzeże Gdańsk, 32:19, á útivelli í fyrstu umferð úrvalsdeildarinnar.
- Arnar Birkir Hálfdánsson skoraði þrjú mörk í öruggum sigri Amo á Anderstorps SK, 35:25, á útivelli í þriðju og síðustu umferð riðlakeppni sænsku bikarkeppninnar í gær. Amo varð í efsta sæti 6. riðils með fullu húsi stiga og tekur sæti í 16-liða úrslitum.
- Íslendingaliðið HF Karlskrona komst ekki áfram í 16-liða þrátt fyrir sigur á IFK Karlskrona í síðustu umferð í 4. riðli sænsku bikarkeppninnar, 29:24, í gær. Ólafur Andrés Guðmundsson skoraði þrjú mörk fyrir HF Karlskrona en Dagur Sverrir Kristjánsson og Þorgils Jón Svölu Baldursson skoruðu ekki mark í leiknum. HK Karlskrona fékk fjögur stig eins og IFK Kristianstand og Vinslövs. Tvö síðarnefndu liðin halda áfram í 16-liða úrslit en HF Karlskrona og IFK Karlskrona sitja eftir í riðlinum.
- Auglýsing -
