- Auglýsing -
- Arnór Snær Óskarsson og félagar í Rhein-Neckar Löwen unnu Melsungen, 31:26, á heimavelli í gær í þriðju umferð þýsku 1. deildarinnar í handknattleik. Rhein-Neckar Löwen hefur byrjað keppnistímabilið af krafti og unnið þrjár fyrstu viðureignir sína. Annað er upp á teningnum en á síðasta ári þegar margt gekk á afturlöppunum.
- Arnór Snær var í leikmannahópi Rhein-Neckar Löwen í gær en kom lítið við sögu. Línumaðurinn Jannik Kohlbacher var markahæstur með átta mörk.
- Elvar Örn Jónsson skoraði þrjú mörk og gaf eina stoðsendingu í liði MT Melsungen og Arnar Freyr Arnarsson skoraði eitt mark. Melsungen tapaði í gær sínum fyrsta leik á keppnistímabilinu í deildinni.
- Áfram er á brattann að sækja hjá Göppingen í þýsku 1. deildinni í handknattleik. Í gær tapaði liðið í heimsókn til Flensburg, 37:32, og hefur eitt stig eftir þrjár fyrstu umferðirnar. Ýmir Örn Gíslason fyrirliði Göppingen skoraði tvö mörk.
- Bjarki Már Elísson var ekki á meðal þeirra sem skoraði mark fyrir Veszprém þegar liðið vann stórsigur á CYEB-Budakalász, 45:26, í ungversku 1. deildinni í handknattleik í gær. Um var að ræða þriðja sigurleik Veszprém í deildinni.
- Óðinn Þór Ríkharðsson skoraði tvö mörk, bæði úr vítaköstum, í eins marks sigri Kadetten Schaffhausen á HSC Kreuzlingen, 29:28, á útivelli í svissnesku A-deildinni í gær. Kadetten er sem fyrr í öðru sæti deildarinnar.
- Stöðuna í mörgum deildum í evrópskum handknattleik er að finna hér.
- Auglýsing -
