Óvíst er hvenær Karolina Olszowa leikur næst með ÍBV eftir að hún meiddist á hné í fyrsta leik ÍBV í Olísdeildinni á dögunum. Sigurður Bragason þjálfari ÍBV sagði við handbolta.is að ekki væri ljóst hversu alvarleg meiðslin væru. Ef um alvarlega meiðsli er að ræða kunni svo að fara að Olszowa verði lengi frá.
Séu meiðslin á hinn bóginn ekki slæm megi eiga von á Olszowu til leiks fljótlega. Í samtali við handbolta.is sagði Sigurður að fljótlega kæmist Olszowa að í skoðun hjá lækni.
Vegna meiðslanna var Olszowa ekki með ÍBV í leikjunum við Val á heimavelli og gegn ÍR í Skógarseli í síðustu viku.
Hlé var gert á keppni í Olísdeildinni fyrir helgina vegna æfinga og leikja landsliðsins á móti Tékklandi síðar í þessari viku.
Næsta viðureign ÍBV í Olísdeild kvenna verður við Stjörnuna 5. október í Hekluhöllinni.
Olszowa hefur leikið með ÍBV frá 2019. Hún framlengdi í vor samning sinn í Eyjum til tveggja ára.
Staðan og næstu leikir í Olísdeildum.
