- Auglýsing -
- Dagur Gautason skoraði fjögur mörk fyrir ØIF Arendal á heimavelli í gær þegar liðið gerði jafntefli við Bergen Håndball, 33:33, í 5. umferð norsku úrvalsdeildarinnar í handknattleik. ØIF Arendal er fallið niður í 9. sæti deildarinnar eftir tap og jafntefli í tveimur síðustu leikjum.
- Birta Rún Grétarsdóttir og samherjar hennar í Fjellhammer eru komnar upp í efsta sæti næst efstu deildar norska handknattleiksins við hlið Volda eftir sigur á Utleira á útivelli í gær, 23:21. Birta Rún skoraði ekki mark í leiknum. Hún átti tvö markskot sem geiguðu. Fjellhammer er taplaust eftir fjórar umferðir.
- Óðinn Þór Ríkharðsson skoraði sex mörk fyrir Kadetten Schaffhausen þegar liðið sótti HSC Kreuzlingen heim á laugardaginn í svissnesku A-deildinni í handknattleik. Kadetten vann leikinn með fjögurra marka mun, 30:26. Kadetten Schaffhausen er efst í deildinni með 16 stig að loknum níu leikjum. Kreuzlingen situr í sjöunda sæti af 10 liðum deildarinnar með sex stig.
- Elmar Erlingsson skoraði eitt mark þegar lið hans Nordhorn gerði jafntefli við TV Großwallstadt, 25:25, á heimavelli í gær en liðin eiga sæti í 2. deild þýska handknattleiksins. Staða Nordhorn var vænleg að loknum fyrri hálfleik, 16:11. Leikmenn TV Großwallstadt bitu í skjaldarrendur í síðari hálfleik. Nordhorn er í 13. sæti af 18 liðum með þrjú stig að loknum fimm leikjum.
- Harpa María Friðgeirsdóttir skoraði eitt mark fyrir Ringsted þegar liðið tapað illa á heimavelli fyrir HØJ, 39:24, í næst efstu deild danska handknattleiksins í gær. Ringsted er í áttunda sæti deildarinnar eftir þrjár umferðir með einn vinning af þremur mögulegum. HØJ og Ajax eru efst og jöfn með þrjá vinninga, sex stig.
[email protected]
- Auglýsing -
