- Auglýsing -
- Stórleikur Elínar Jónu Þorsteinsdóttur landsliðsmarkvarðar dugði ekki Aarhus United til sigurs á Viborg í dönsku úrvalsdeildinni í gær. Elín Jóna varði 13 skot, 38%, í tveggja marka tapi á útivelli, 27:25. Aarhus United er í áttunda sæti deildarinnar eftir sex umferðir með fjögur stig.
- Stöðuna í dönsku úrvalsdeildinni og í fleiri deildum evrópsks handknattleiks er að finna hér.
- Elín Jóna er væntanleg til landsins til æfinga með landsliðinu fyrir vináttuleikina tvo við Pólverja í Lambhagahöll Fram á föstudaginn og í Sethöllinni á Selfossi á laugardaginn. Leikirnir eru liður í undirbúningi kvennalandsliðsins fyrir Evrópumótið sem hefst eftir rúman mánuð.
- Jóhanna Margrét Sigurðardóttir skoraði fjögur mörk og gaf eina stoðsendingu þegar lið hennar, Kristinstad HK, tapaði naumlega í heimsókn til Kungälvs HK, 24:23, í sænsku úrvalsdeildinni í gær. Berta Rut Harðardóttir skoraði ekki mark fyrir í leiknum fyrir Kristinstad HK.
- Jóhanna Margrét er einnig væntanleg til Íslands til móts við landsliðið eins og Elín Jóna markvörður.
- Vilborg Pétursdóttir skoraði fimm mörk fyrir AIK þegar liðið tapaði naumlega á útivelli fyrir Kärra HF, 22:21, í Allsvenskan, næst efstu deild sænska handknattleiksins í gær. AIK var fimm mörkum yfir í hálfleik, 13:8, en tapaði niður þræðinum í síðari hálfleik. AIK, sem kom upp í deildina í vor, er í 7. sæti með fimm stig eftir fimm leiki. Kärra HF er stigi ofar í sjötta sæti.
- Birta Rún Grétarsdóttir var í leikmannahópi Fjellhammer þegar liðið vann Levanger, 24:17, í næst efstu deild norska handknattleiksins í gær. Birta Rún skoraði ekki í leiknum. Fjellhammer er efst og taplaust í deildinni að loknum sex leikjum. Aker og Volda er skammt á eftir með fullt hús stiga eftir fimm leiki. Með Volda leikur Dana Björg Guðmundsdóttir sem valin var í fyrsta sinn í íslenska landsliðið fyrir helgina. Volda á leik í dag gegn Nordstrand.
- Tryggvi Þórisson skoraði eitt mark þegar IK Sävehof vann Önnereds, 32:27, í sænsku úrvalsdeildinni á heimavelli í gær. IK Sävehof færðist með sigrinum upp í annað sæti úrvalsdeildar með 10 stig eftir sjö leiki, liðið er tveimur stigum á eftir Ystads IF.
- Tryggvi og samherjar hans í sænska meistaraliðinu IK Sävehof koma til Íslands á morgun, mánudag. Þeir mæta FH í þriðju umferð riðakeppni Evrópudeildar í Kaplakrika á þriðjudag klukkan 18.45.
- Janus Daði Smárason var ekki með Pick Szeged í gær þegar liðið tapaði fyrir Csurgói KK, 32:27, í ungversku 1. deildinni í handknattleik. Þetta var fyrsta tap Pick Szeged í deildinni á tímabilinu. Fram kom í hlaðvarpsþættinum Handkastið í gærmorgun að Janus og unnustu hans eigi von á barni á næstu dögum og Janus væri e.t.v. í leyfi af þeirri ástæðu.
- Auglýsing -
