- Auglýsing -
- Bergischer HC, sem Arnór Þór Gunnarson þjálfar, vann HSG Konstanz, 34:23, á heimavelli í upphafsleik 8. umferðar 2. deildar þýska handknattleiksins í gær, 34:23. Tjörvi Týr Gíslason leikmaður Bergischer HC skoraði ekki mark í leiknum. Bergischer HC er í efsta sæti deildarinnar með 13 stig að loknum átta leikjum.
- Elmar Erlingsson og liðsfélagar í HSG Nordhorn-Lingen töpuðu í gær á heimavelli fyrir ASV Hamm-Westfalen, 35:25, í þýsku 2. deildinni í handknattleik. Áfram er á brattann að sækja hjá Nordhorn. Liðið er í 15. sæti af 18 liðum deildarinnar með þrjú stig eftir sjö leiki. Ekki er tölfræði að finna úr leiknum en því miður hefur ný vefsíða þýsku karladeildanna sem tekin var í notkun fyrir leiktíðina verið af og til í lamasessi. M.a. hafa stjórnendur deildarinnar legið undir gagnrýni af þessu sökum.
- Stöðuna í þýsku 2. deildinni og í fleiri deildum evrópsks handknattleiks er að finna hér.
- Dana Björg Guðmundsdóttir skoraði sex mörk og var einu sinni vikið af leikvelli í tvær mínútur þegar lið hennar, Volda, vann Nordstrand í næst efstu deild norska handknattleiksins í gær, 24:17. Volda er efst í deildinni með 12 stig að loknum sex leikjum eins og Fjellhammer sem Birta Rún Grétarsdóttir leikur með. Aker hefur 10 stig en hefur aðeins lagt fimm leiki að baki.
- Aldís Ásta Heimisdóttir skoraði fjögur mörk og gaf fimm stoðsendingar þegar Skara HF tapaði fyrir IF Hallby HK í sænsku úrvalsdeildinni í handknattleik í gær, 28:23. Leikið var í Skara. Ekki hefur gengið sem skildi hjá Aldísi Ástu og samherjum í upphafi leiktíðar. Skara er aðeins með þrjú stig eftir sex leiki í níunda sæti deildarinnar.
- Danska úrvalsdeildarliðið Fredericia HK sem Guðmundur Þórður Guðmundsson þjálfar stökk upp í þriðja sæti deildarinnar í gær með öruggum sigri á Ringsted, 34:28, á heimavelli. Einar Þorsteinn Ólafsson skoraði eitt mark en Arnór Viðarsson skoraði ekki að þessu sinni. Einar Þorsteinn átti einnig eina stoðsendingu og var einu sinni vikið af leikvelli í tvær mínútur.
- Stöðuna í dönsku úrvalsdeildinni og í fleiri deildum evrópsks handknattleiks er að finna hér.
- Auglýsing -
