- Auglýsing -
- Franska meistaraliðið PSG hefur staðfest að sænski landsliðsmarkvörðurinn Andreas Palicka yfirgefur félagið næsta sumar eftir tveggja ára veru. Í tilkynningu PSG kemur fram að Palicka ætli að flytja heim til Svíþjóðar. Orðrómur hefur verið uppi um að hugsanlega semji Palicka við norska meistaraliðið Kolstad og leysi af Torbjørn Bergerud sem samið hefur við Wisla Plock.
- Danski markvörðurinn Jannick Green hefur aftur á móti framlengt samning sinn við PSG fram til ársins 2026. Í stað Palicka kemur ungur danskur markvörður, Mikkel Løvkvist, frá Bjerringbro/Silkeborg.
- Branislav Angelovski þjálfari Norður Makedóníumeistara Eurofarm Pelister sagði starfi sínu óvænt lausu í gærkvöld eftir liðið tapaði fyrir RK Alkaloid, 32:25, á heimavelli í úrvalsdeildinni karla. Pelister hefur unnið úrvalsdeild karla síðustu þrjú ár í Norður Makedóníu en hefur þegar tapað tveimur leikjum í deildinni. Auk tapsins í gær beið Pelister lægri hlut í leik við HC Vardar fyrir nokkrum vikum.
- Eurofarm Pelister á næst leik við ungverska stórliðið Veszprém með Aron Pálmarsson og Bjarka Má Elísson innanborðs í Meistaradeild Evrópu annað kvöld á heimavelli.
- Glenn Solberg fyrrverandi landsliðsþjálfari Svíþjóðar í handknattleik hefur verið ráðinn sem þjálfari hjá Olympiatoppen í Noregi sem m.a. hefur umsjón með undirbúningi norsks íþróttafólks fyrir stórmót.
- Sænski handknattleiksmaðurinn Adam Nyfjäll er sagður vera á leið frá Hannover-Burgdorf til Lemgo. Línumaðurinn er sagður vonsvikinn yfir fáum tækifærum með Hannover-Burgdorf á leiktíðinni og hafi ekkert á móti því að breyta til.
- Einn helsti leikmaður serbensku meistaranna RK Vojvodina, Petar Djordjic, var leystur undan samningi að eigin ósk í vikunni. Umsvifalaus samdi hann við höfuðandstæðinginn RK Partizan. Mikill hugur er kominn í stjórnendur RK Partizan. Þeir réðu á dögunum Renato Vugrinec fyrrverandi landsliðsmann Slóvena í starf framkvæmdastjóra, mörgum að óvörum. RK Partizan tapaði fyrir FH í 32-liða úrslitum Evrópubikarkeppninnar fyrir um ári.
- Auglýsing -
